35 мың жаңа жұмыс орны құрылады
ҚР Үкіметінің баспасөз орталығында Мемлекет басшысының «Халық бірлігі және жүйелі реформалар – ел өркендеуінің берік негізі» атты Қазақстан халқына арнаған Жолдауы бойынша брифинг өтті, деп жазады Egemen.kz.Брифингке ҚР Премьер-Министрінің орынбасары Роман Скляр, Ауыл шаруашылығы министрі Ербол Қарашөкеев, Индустрия және инфрақұрылымдық даму министрі Бейбіт Атамқұлов және Энергетика министрі Мағзұм Мырзағалиев қатысты.
Экономиканы қалпына келтіру және одан әрі өсу траекториясына шығу үшін Президенттің тапсырмасы бойынша 2022 жылдың соңына дейін Қазақстанда «Қарапайым заттар экономикасы» бағдарламасы шеңберінде шағын және орта бизнесті қолдау шаралары ұзартылды.
«Бағдарламаны іске асырудың 2,5 жылында 787 млрд теңге сомасына 3011 жоба мақұлданды. Аталған жобаларды іске асыру ішкі нарықты отандық тауарлармен толықтыруға, өңдеу өнеркәсібінің бәсекеге қабілеттілігін ынталандыруға, ең алдымен, халық тұтынатын тауарлардың ауқымды номенклатурасын шығаруға бағытталған», деп атап өтті Р.Скляр.
Барлық жобаны іске асырудың арқасында 35 мың жаңа жұмыс орны құрылып, салық базасы 100 млрд теңгеге ұлғаяды деп болжанып отыр.
