Тазалық бар жерде тәртіп бар
Әйтеке би кентінің 5 квартал аймағындағы Жетес би ескерткіші орналасқан саябақ бүгінде тұрғындар үшін жиі бас қосатын орынға айналған. Осы аймақта тұратын халықтың ауызбіршілігінің арқасында Наурыз мерекесінде алты қанат киіз үй тігіліп, наурызкөже пісіріледі. Жастар асық ату, арқан тарту, батпан көтеру сияқты ұлттық спорт түрлерінен жарысып, жеңімпаздарды анықтайды. Жаңа жыл мерекесінде де шырша орнатылып, концерттік бағдарлама да ұйымдастырылады.Бүгін аудан басшысы Мұхтар Оразбаев саябаққа арнайы барып, кент әкіміне бірқатар тапсырмалар берді.
– Кент тұрғындары жиі бас қосатын орын бүгінгі күннің талаптарына сай болуы қажет. Сондықтан талдардың түбін әктеп, темір қоршауларды, киіз үйдің формасында жасалған әдемі дүниені де сырлау қажет. Балалар жаттығатын құрал-жабдықтардың бұзылған жерлері де қалыпқа келтірілсін.
Сонымен қатар, түнгі мезгілде жанып, айналаға жарық шашып тұратын жарықшамдар орнату жағы қарастырылса, – деген аудан басшысы Әйтеке би кентінің әкімі Қайрақбай Орынбасаровқа тез арада қалыпқа келтіру жұмыстарын тапсырды.
"ҚАЗАЛЫ" ақпарат
