Сақтықта қорлық жоқ
Мемлекет басшысы Қасым-Жомарт Тоқаевтың төтенше жағдай режимін қамтамыз ету жөніндегі мемлекеттік комиссияның қорытынды отырысын өткізгендігі туралы ақпараттық агенттіктер арқылы таныстым. Елде төтенше жағдай режимі толықтай тоқтатылғанымен, карантиндік шектеулер әр өңірдегі жағдайға орай әлі де жалғасатындығы айтылды. Дегенмен көптеген саланың қызметі қалпына келе бастады. Қаншама адам жұмысқа шықты. Бүгіннен бастап елдегі дүкендердің біразы және саябақтар ашылады, сән салондарының, білім орталықтарының, тағы басқа нысандардың қызметі қайта жанданады.Алайда Президент күнделікті өмірде сақтық шараларын қатаң ұстауды айрықша атап өтті. Енді әрбіріміз «Сақтансаң, сақтаймын» деген сөзді берік ұстанып, өз денсаулығымыз бен қоғам алдындағы жауапкершілігімізді арттыруға тиіспіз. Барынша карантин режимін қатаң сақтап, көпшілік орындарға топтасуды әлі де доғара тұруымыз қажет.
Баршамызға мәлім, 1 мамыр күні Өзбекстан Республикасындағы Сардоба су қоймасы бөгетінің бұзылуы салдарынан Түркістан облысында су тасқыны болды. Мақтарал ауданына қарасты 5 ауылдың 1 мыңнан астам тұрғын үйін су басып қалды. 9 елді мекенді су алу қаупі туындады. Осы ретте де мемлекет тарапынан шұғыл қабылданған шаралардың арқасында су тасқынының әрі қарай таралуына жол берілмеді. Президент өз сөзінде табиғат апаты зардаптарын жою, тазалау жұмыстары жүргізіліп жатқандығын, қоғамдық тәртіп пен тұрғындардың дүние-мүлкінің сақталуын қамтамасыз ету басты назарда екендігіне мән берді.
Жұмыла көтерген жүк жеңіл. Қысылтаяқ шақта бір жеңнен қол, бір жағадан бас шығара білген қазақстандықтар Түркістан халқына қолдау көрсетіп, жүрек жылуын сыйлауда. Осындай бекем бірлік, мығым тірліктің нәтижесінде кез келген қиындықты еңсеретіндігімізге сенім мол.
Айгүл ЕРІШОВА,
«Балапан» балабақшасның меңгерушісі
