Ақтан батыр ауылының тұрғыны Еркін Серікбаев ауылдан қоғамдық монша және шаштараз қызметін көрсететін кешен ашты. Ол «Нәтижелі жұмыспен қамту және жаппай кәсіпкерлікті дамытудың 2017-2021 жылдарға арналған» бағдарламасының екінші бағыты «Бастау-Бизнес» жобасы аясында оқып, кәсіпкерлік саласындағы білімін жетілдірді.

Жобасы сәтті шыққан жас кәсіпкер Қызылорда "Өңірлік Инвестициялық орталығы Микро қаржылық ұйымы" арқылы 5 миллион теңге несиеге қол жеткізді. Еркін кәсіп ашу арқылы екі адамды жұмыспен қамтып отыр.

Жуырда салтанатты түрде ашылатын нысанда азық-түлік дүкені, шаштараз, қоғамдық монша орналасқан.

Еркін Әзілханұлы Қазалы кәсіптік-техникалық колледжінің "Жол құрылысы" мамандығы бойынша бітірген. Алайда кәсіпкерлікке қарай бет бұрғанына өкінбейді. Талабы таудай жас кәсіп ашам деген ниетіне мемлекеттің көрсеткен қолдауына дән риза. Енді Еркін тек еңбек етуді көздейді. Алда ауқымды істерді атқарсам деген жиырма жасар жігіттің бұл ісі замандастарына ой саларлық.