Көшпенділер ойындары: Көкпардан Қазақстан құрамасы ресейліктерді ойсырата ұтты

Қырғыз Республикасында өтіп жатқан III Дүниежүзілік көшпенділер ойындарында көкпардан Қазақстан құрамасы Ресейдің Красноярск командасын ойсырата жеңді, деп хабарлайды Baq.kz ақпарат агенттігі.

Қырғызстанның Бактуу-Долоноту ауылында өткен көкпар додасында еліміздің құрыш білек, тас тақым жігіттері Ресейдің Красноярск командасын айқын басымдықпен жеңді. С тобында үзеңгі қағыстырған жерлестеріміздің бұл алғашқы ойыны және алғашқы жеңісі екенін де айта кеткен абзал.

«Сіз бен біз, әсіресе қырғыздар күткен көкпардан Ұлттық құрама бүгін алғашқы ойынын Ресейдің Красноярск командасымен өткізіп, қарсыластарын 15:3 есебімен ойсырата жеңді», - дейді ҚР Мәдениет және спорт министрлігінің Спорт және дене шынықтыру істері комитетінің баспасөз хатшысы Раухан Тұғұмбаева өзінің әлеуметтік желідегі парақшасында.

15:3 есебімен жеңіске жеткен жерлестеріміз қазір АҚШ құрамасымен ойнап жатқанын айта кетейік.