WhatsApp қолданушыларының қайда жүргенін анықтайтын қосымша пайда болды

App Store дүкенінде iPhone иелері WhatsApp қолданушыларының қайда жүргенін анықтайтын Chatwatch қосымшасы пайда болды, деп хабарлайды Baq.kz ақпарат агенттігі Lifehacker басылымына сілтеме жасап.

Аталған қосымша WhatsApp тізіміндегілердің қай уақытта оянып, қай кезде ұйықтайтынын көрсетеді.

"Chatwatch қосымшасын туыстарыңыздың, достарыңыз бен қызметкерлеріңіздің белсенділігін бақылап отыру үшін пайдаланыңыз", - делінген қосымшаның сипаттамасында.

Сондай-ақ, Chatwatch тізімдегі адамдардың бір-бірімен сөйлескен-сөйлеспегенін анықтауға көмектеседі. Ол үшін қосымша бірнеше қолданушының мәліметтерін салыстырады. Осылайша Facebook компаниясы қолданушылардың мәліметтерін қандай мақсатта пайдаланатындарын көрсетпек.

Lenta.ru басылымының хабарлауынша, қосымшаның бағасы - 1,99 доллар. Осы ақшаға қолданушылар WhatsApp тізімінде бар екі адамды бір апта бойы бақылауға мүмкіндік алады.

Мұнымен қатар, қосымшаның құрастырушылары жиналған ақшаның Дональд Трампқа қарсы бейкоммерциялық саяси ұйымды қаржыландыру үшін жұмсалатынын айтады.