Мажарстан Қазақстанның вакциналау паспортын мойындаған алғашқы ел болды
Мажарстан Қазақстанның вакциналау паспортын мойындады, - деп хабарлайды Tengrinews.kz СІМ сайтына сілтеме жасап.Ведомство мәліметі бойынша, Мажарстанның Сыртқы істер және сыртқы байланыстар министрлігінде Қазақстан елшісі Жәнібек Әбдірашов Мемлекеттік хатшының орынбасары Андраш Баранимен кездесіп, екі ел арасындағы вакцинациялау паспортын өзара тану туралы вербалды нотамен алмасқан.
"Иммундау сертификаттарының болуы COVID-19 таралуын болдырмауға бағытталған шектеу шараларынсыз (ПТР-сынама және карантин) екі ел азаматтарының Қазақстанға және Мажарстанға кіруіне кепілдік береді", - делінген хабарламада.
Өзара мойындау шекараларды ашу және Будапешт пен Нұр-Сұлтан арасындағы тікелей әуе қатынасын жандандыру бойынша алғашқы қадамдардың бірі саналады. Осылайша, Мажарстан қазақстандық вакцинация паспорттарын мойындайтын Еуропалық одақтың алғашқы елі болды.
