Мұнан кейін халық қалау­лылары ауданаралық аурухананың мәжіліс залында медицина саласы қызметкерлерімен жүздесті. Онда аудан әкімі Мұрат Ергешбаев әлеуметтік бағдарламалар жүйелі жүзеге асып жатқандығын айтып, өңірдің тыныс-тіршілігімен таныстырды. Кездесуде халық қалаулысы Сапар Ахмет дәрігерлердің елеулі еңбегіне алғаусыз алғысын жеткізді. Жауапкершілігі мол ауыртпалықты қайыспай көтере білген қызметкерлерге мемлекет тарапынан қолайлы жағдай жасалып жатқандығын алға тартты.

Сондай-ақ, орталық ауру­ха­на­дағы «Ангиограф» медици­налық аппараты іске қосылса, аудан үшін үлкен жетістік екендігіне тоқталды. Нақты мәлімет бойынша қазір арнайы бір бөлме дайындалып, заманауи қондырғыны бейімдеу жұмыс­тары жүргізілуде. Тиісті мамандар оқытылып, облыстық меди­цина орталығында толық тәжірибеден өткізілген. Көп ұзамай халық медициналық аппараттың игілігін көретін болады. Бір қуан­тарлығы бұл келешек жедел және сапалы ота жасауға септігін тигізбек. Нәтижесінде Қазалыдан бөлек, көршілес Қармақшы, Арал аудандары мен Байқоңыр қа­ласы тұрғындарына да қызмет көр­сетіледі деп күтілуде.

Жиын барысында ауданаралық аурухананың балалар дәрігері Әсия Жәдігерқызы жаңа аурухана пайдалануға берілгенде толық жетілдірілген медициналық құрал­дармен жабдықталғандығына ал­ғысын білдірді. Сөз арасында халық қалаулыларына аудандық емхана тар екенін айтып, жаңадан ғимарат тұрғызуға атсалысуларын сұрады.

Жұмыс сапары барысында Парламент Мәжілісінің депутаттары “Nur Otan” партиясы аудандық филиалында қоғамдық қабылдау өткізіп, аудан тұрғындарының өті­ніш-тілектерін тыңдады.