Қазақстандықтар тамызда ең жарқын жұлдыз жаууын тамашалай алады
Фото: Pixabay.comҚазақстандықтар келесі аптаның басында жүзден астам жұлдыздың аққанын көре алады. Персеид метеорлық жаңбыры 12-13 тамыз түнінде шарықтау шегіне жетеді. Мамандардың айтуынша, биыл бұл астрономиялық құбылысты бақылауға жағдай ерекше қолайлы болмақ. Бұл туралы Stan.kz ақпарат агенттігі хабарлайды.
Жұлдыз жаууын түн ортасынан кейін таң атқанға дейін бақылаған дұрыс. Астрономдар бақылауға қала жарығы кедергі келтірмеуі үшін елді мекеннен алыс, қараңғы жерге шығуға кеңес береді.
Бұған қоса, биыл Персеид ағынының шарықтау шегі жаңа айдан кейінгі кезеңге сәйкес келеді. Сондықтан Айдың жарығы бақылауға айтарлықтай әсер етпейді. Егер аспан ашық болса, қазақстандықтар сағатына 100-ге дейін метеорды көре алады.
Бұл құбылысты тамашалау үшін арнайы құрал-жабдықтың қажеті жоқ. Ашық аспан көрінетін жерді таңдап, көздің қараңғылыққа бейімделуі үшін бірнеше минут күту жеткілікті.
