Технология таңдаулыларға ғана емес, баршаға қызмет етуге тиіс – Президент
Қасым-Жомарт Тоқаев жасанды интеллектіні дамытудың негізгі қағидаттарын атап өтті, деп жазады inbusiness.kz сайты.
Фото: akorda.kz"Форумның жаңа бағдары халықаралық ынтымақтастыққа тың серпін беріп, жасанды интеллектіні халқымыздың игілігі жолында тиімді пайдалануға септігін тигізеді.Жаһандық өркениеттің келбетін өзгертетін басты күш ретінде жасанды интеллект бүгінде адамзат өмірінің мәнін қайта саралауға мәжбүрлеп отыр. Бұл – баршамызға үлкен сынақ. Сондықтан біз инженерлер мен басқа да кәсіп иелерін, сондай-ақ осы технологияның мәні мен даму беталысын пайымдай алатын гуманитарлық сала мамандарының жаңа буынын тәрбиелеп шығаруымыз керек", – деді Мемлекет басшысы.
Президенттің айтуынша, жасанды интеллект қоғамның болмыс-бітімін, дәстүрін, құқықтық нормалары мен адамгершілік қағидаларын қамтуы тиіс. Сондықтан оны дамыту ісіне философтар, әлеуметтанушылар және заңгерлер де атсалысуы қажет.
"Технология әлеуметтік теңсіздікті ушықтырмауы, азаматтардың мінез-құлқы мен таңдауына манипуляция жасамауы керек. Ол үшін тиімді шаралар қабылдауымыз қажет.Артықшылыққа ие топтар алгоритмдерді пайдаланып, әлдебір құндылықтар мен ойлау моделін қоғамға таңуы ықтимал. Оған жол беруге болмайды. Бұл әлемнің мәдени әралуандығына қиянат жасау болып саналады. Технология таңдаулыларға ғана емес, баршаға қызмет етуге тиіс. Әділ шешімі осы", – деді Қасым-Жомарт Тоқаев.
