Қазақстандықтар үшін коммуналдық қызмет ақысы жыл сайын өседі: Ол АЕК-ға байланысты болады
Фото: FreepikҚазақстанда 15 қыркүйектен бастап көппәтерлі тұрғын үйлерді күтіп-ұстауға арналған ең төменгі тарифтер автоматты түрде АЕК-ке (2025 жылы – 3 932 теңге) байланысты есептеледі. Бұл туралы Stan.kz ақпарат агенттігі хабарлайды.
Жылжымайтын мүлік федерациясының басшысы Ермек Мүсрепов бұл шешім жүйені инфляцияға төзімдірек әрі меншік иелері үшін түсінікті ететінін айтты. Енді жыл сайынғы индексация қолмен келісуді қажет етпейді және әкімшілік кідірістерді азайтады.
Оның сөзінше, тарифтердің АЕК-ке байлануы басқарушы компаниялар, мүлік иелері бірлестіктері мен тұрғын үйлердің кірісін материалдар, қызметтер мен жалақы қымбаттаған жағдайда құнсызданудан қорғайды. Алайда қазіргі кезде тарифтері тым төмен болып келген аймақтарда ең төменгі тариф көтеріледі, ал кейінгі өсім АЕК өзгерген сайын автоматты түрде жүретін болады.
Басты қауіптердің қатарында – отбасылар үшін қаржылық жүктеменің артуы және өңірлер арасындағы шығындардың айырмашылығы бар.
"Тіпті ең төменгі тариф енгізілген жағдайда да, оның құрамына нақты қандай қызметтер кіретіні және нормалар қалай есептелетіні анық көрсетілуі тиіс. Егер әдістеме әлсіз болса, дау-дамай мен түсінбеушіліктер туындауы мүмкін", – деп ескертті Мүсрепов.
Ол тұрғын үй және әлеуметтік көмекке арналған қолданыстағы механизмдерді еске салды. Бірақ жаңа ең төменгі тарифке арнайы жеңілдіктерді алдын ала бекіту қажеттігін атап өтті.
"АЕК-ке байлану – дұрыс бағыт, бірақ есептеудің нақты ережелері болуы тиіс және осал меншік иелерін қолдау қажет, сонда жаңа тарифтер оларға ауыртпалық емес болады", – деп қорытындылады сарапшы.
