Аралдық ағайынға көмек көрсетті
Қазіргі таңда еліміздің кейбір аймақтарында қуаңшылықтың салдарынан ауыл шаруашылығына, әсіресе мал шаруашылығына кері әсер етіп жатқан жағдай жиі байқалуда. Мал азығының тапшылығы – бұл тек экономикалық мәселе емес, ауыл халқының тұрмыс-тіршілігі мен әлеуметтік тұрақтылығына тікелей қауіп төндіретін күрделі проблема. Осындай сындарлы кезеңде ауданаралық қолдаудың, татулық пен бірліктің маңызы арта түседі.Жуырда Қазалы ауданының әкімдігі мен жергілікті шаруалар бірлесе отырып, Арал ауданына қарасты Жіңішкеқұм ауылдық округінде шөп жәрмеңкесін ұйымдастырды. Бұл іс-шара Арал өңіріндегі қуаңшылық салдарынан мал азығының жетіспеушілігінен зардап шеккен шаруаларға нақты көмек көрсету мақсатында өткізілді. Қазалыдан жеткізілген 2200-ден астам мал азығы нарықтағы бағамен салыстырғанда қолжетімді бағада сатылды. Нақтырақ айтсақ, жоңышқаның бумасы 1200 теңгеден, шөптің бумасы 650 теңгеден ұсынылды.
Бұл шара Аралдық малшылар үшін үлкен демеу болды. Қуаңшылықтан туындаған қиындықтарға қарамастан, ауыл тұрғындары өз малын азықпен қамтып, шаруашылықтарын сақтап қалуға мүмкіндік алды. Сондай-ақ, жәрмеңке барысында ауыл тұрғындарының әлеуметтік жағдайына қолдау көрсетіліп, тұрғындар арасында татулық пен ынтымақтың нығаюына септігін тигізді.
Аудан әкімдігінің, жергілікті шаруалардың және халықтың бірлесе атқарған бұл жоба – ауыл шаруашылығын дамыту мен ауылдық жерлердегі тұрақтылықты қамтамасыз етуде үлгі боларлық бастама. Алдағы уақытта да осындай ынтымақтастық пен қолдау шаралары жалғасып, ауылдың дамуы мен тұрмысының жақсаруына ықпал етеді деген сенімдеміз.
Ербол МАРАТҰЛЫ
