Қазақстанда балаларға "спортпен шұғылдануға тыйым салынғаны" рас па
Сурет: pixabay.com
Қазақстанның Туризм және спорт министрлігі елде балаларға спортпен айналысуға тыйым салынды деген ақпаратқа қатысты түсінік берді, деп хабарлайды Zakon.kz.
Ведомствоның ресми түсіндірмесі 2025 жылғы 28 шілдеде Instagram парақшасында жарияланған:
"Қазақстан Республикасының Туризм және спорт министрлігі бірқатар бұқаралық ақпарат құралдарында тараған "балаларға спортпен айналысуға тыйым салынды" деген ақпаратқа байланысты түсінік беруді қажет деп санайды. 2025 жылғы 16 шілдеде бекітілген №133 бұйрықтың бұқаралық ақпарат құралдарындағы интерпретациясы шындыққа жанаспайды", - делінген хабарламада.
Министрліктің мәліметінше, бүгінде Қазақстанда 4 пен 17 жас аралығындағы 5,1 миллионнан астам бала мен жасөспірім тұрақты түрде спортпен айналысады.
"Сайыстар – спорттық дайындықтың бір бөлігі ретінде – белгілі бір физикалық әрі эмоционалдық жүктемелермен қатар жүреді. Осыған байланысты министрлік спорттық жарыстарға қатысу үшін ең төменгі жас шегін белгілеген. Бұл шара ең алдымен балалардың денсаулығын қорғау және жас шамасында болатын жарақаттардың алдын алу мақсатында енгізілді", - деп түсіндірді Туризм және спорт министрлігі баспасөз қызметі.
Сонымен қатар бұл жас шектеулері спорттық федерациялардың ұсыныстары негізінде белгіленіп, ҚР Денсаулық сақтау министрлігімен келісілген және халықаралық стандарттарға сәйкес келеді.
"Бұл талаптар тек жарыстарға қатысуға қатысты және балаларды спорт мектептеріне, секцияларға немесе спорттық резерв даярлау мекемелеріне қабылдауға еш қатысы жоқ. Сондықтан "балаларға спортпен шұғылдануға тыйым салынды" деген ақпарат шындыққа сай емес. Мұнда тек жарыстарға қатысудағы жас талаптары туралы айтылып отыр", - деп нақтылады министрлік.
