Иранның солтүстігінде 5,2 балдық жер сілкінісі тіркелді
Фото: istockphotoИранның солтүстік бөлігінде магнитудасы 5,2 болатын жер сілкінісі тіркелді. Бұл туралы Еуропа-Жерорта теңізі сейсмологиялық орталығы (EMSC) мәлімдеді, деп хабарлайды BAQ.KZ.
Жерасты дүмпуі Гринвич бойынша 19 шілде күні сағат 21:37-де (Астана уақытымен 02:37) Шахруд қаласынан 44 шақырым солтүстік-батыста орын алған. Қаланың халқы шамамен 131 мың адамды құрайды. Зілзаланың ошағы жердің 7 км тереңдігінде орналасқан.
Қазіргі уақытта қаза тапқандар мен зардап шеккендер туралы ақпарат түскен жоқ.
Айта кетейік, бұған дейін, 18 шілдеде Түркияның курортты Анталья қаласында да 4,1 балдық жер сілкінісі болғаны хабарланған. Түркияның төтенше жағдайлар және апаттар басқармасының (AFAD) мәліметінше, онда да ешқандай адам шығыны немесе қирау тіркелмеген.
