Қазақстандық компания 2 миллион долларды елден заңсыз шығарған
Фото: pixabay.comКомпаниялардың бірі 2 миллион долларды Қазақстаннан заңсыз шығарған. Бұл туралы Stan.kz ақпарат агенттігі хабарлайды.
Алматы облыстық прокуратурасының мәлімдеуінше, "Т" ЖШС шетелдік компаниямен құны 6 млн доллар болатын тауар жеткізуге келісімшарт жасасқан. Алайда елімізге 3,7 миллион доллардың ғана тауары әкелінген. Қадағалаушы орган өкілдері 2 миллион доллардан астам сома келісімшарт міндеттемелерін орындау желеуімен шетелге аударылғанын айтады.
"Компания соманы қайтару бойынша ешқандай шара қолданбаған, ал салық органы репатриация талаптарының орындалмауын қамтамасыз етпеген", – делінген прокуратура хабарламасында.
Осыған байланысты прокуратура Әкімшілік құқық бұзушылық туралы кодекстің Ұлттық валютаны және шетел валютасын репатриациялау талабын орындамау бабының 2-бөлігімен әкімшілік іс қозғады.
Қонаев қалалық сотының шешімімен "Т" ЖШС-ға 239 миллион теңге көлемінде әкімшілік айыппұл салынды. Сот актісі заңды күшіне енді.
