Ең төменгі жалақы 90 мың теңгеден асуы ықтимал
Қазақстанда ең төменгі жалақыны қайта қарау жөніндегі есептеулер басталды.
Фото: Depositphotos/4exҚаржы министрі Мәди Такиевтің айтуынша, жаңа мөлшер 90 мың теңгеден сәл жоғары болуы мүмкін, деп жазады inbusiness.kz сайты.
Парламент палаталарының бірлескен отырысынан кейін Мәди Такиев ең төменгі жалақыны (ЕТЖ) көтеру мүмкіндігі бар екенін растады. Қазір Еңбек және халықты әлеуметтік қорғау министрлігі Ұлттық экономика министрлігімен бірлесіп қажетті есептеулер жүргізіп жатыр.
"Ең төменгі жалақы мөлшерін көтеруге әлеуетіміз жеткілікті. Алдын-ала есептеулер бойынша, ол 90 мың теңгеден сәл жоғары болуы мүмкін", — деді министр.
Дәл қазір елімізде ЕТЖ 85 000 теңге деңгейінде тұр. Бұған дейін Еңбек және халықты әлеуметтік қорғау министрі Светлана Жақыпова да келер жылы ең төменгі жалақы өсетіні туралы мәлімдеген болатын.
