Экология министрлігі 800 мың киікті атпақ
Бұл туралы Үкімет отырысынан кейін ведомство басшысы Ерлан Нысанбаев мәлімдеді.
Фото: istockphoto.com
Фото: istockphoto.comЭкология және табиғи ресурстар министрлігі киік санын реттеу мақсатында 800 мың басты табиғи ортадан алу туралы шешім қабылдады. Бұл туралы Үкімет отырысынан кейін ведомство басшысы Ерлан Нысанбаев мәлімдеді, деп хабарлайды Skifnews.kz ақпарат порталы.
Министрдің айтуынша, қазіргі таңда Қазақстандағы киіктердің жалпы саны – 3 миллион 978 мың. Оның ішінде 2,3 миллионы Орал популяциясына, 1,6 миллионы Бетпақдалаға, ал 78 мыңы Үстірт өңіріне тиесілі. Ғылыми зерттеулер аталған жануарлардың саны тым көбейіп кеткенін көрсеткен.
«Ғалымдар жалпы популяцияның 20 пайызын табиғи ортадан алу қажет деп отыр. Соған сәйкес, шамамен 800 мың бас киік реттеледі. Олардың 40 пайызы – аталық, 40 пайызы – аналық, 20 пайызы – төлдер», – деді министр.
Осы мақсатта өңірлерде ет өңдейтін кәсіпорындар ашу мәселесі қарастырылып жатыр. Министрлік бұл бағытта жергілікті әкімдіктермен бірлесіп жұмыс істеуде.
Қабылданған шешім киік популяциясын тұрақты деңгейде ұстап тұруға бағытталған. Сонымен қатар, табиғи тепе-теңдікті сақтау мен ауыл шаруашылығы жерлерін қорғау мәселесі де ескерілген.
