Қазақстан Қытаймен инвестициялық ынтымақтастықты жаңартпақ
Фото: ytheagency“Қытай – Орталық Азия” ІІ индустриялық-инвестициялық ынтымақтастық форумында Премьер-Министрдің бірінші орынбасары Роман Скляр инвесторларды қолдаудың маңызы туралы айтты және Қазақстан мен Қытай арасында инвестицияларды қорғау жөніндегі жаңартылған келісімге қол қойылатынын хабарлады, деп хабарлайды BAQ.KZ.
Роман Склярдың сөзінше, Қазақстанда әрбір инвесторға жеке “под ключ”, яғни толық қамқорлық көрсетіледі. Бұл дегеніміз салықтар мен кедендік төлемдерден босату, түрлі гранттар беру, инфрақұрылым мәселелерін шешу сияқты жеңілдіктерді қамтиды. Сонымен қатар инвесторларға ресурстарға қолжетімділік пен экспортқа көмек беріледі.
Біз инвесторларға барлық жағдайды жасап, қолдау көрсетеміз. Қытайлық серіктестерді Қазақстан мен Орталық Азияда жаңа жобаларды жүзеге асыруға шақырамыз, – деді Скляр.
Жаңартылған келісім Қытай инвесторлары үшін елімізде жұмыс істеуді жеңілдетіп, сенімді әрі тиімді етеді деп күтіліп отыр.
Еске салайық, Қазақстанда қытайлық компаниялардың арқасында 50 мың жаңа жұмыс орны ашылған.
