Әйелдер күресі: Жәмиля Бақбергенова әлемдік рейтингіде бірінші орында
Фото: Olympic.kzГрек-рим, еркін және әйелдер күресі бойынша Халықаралық күрес федерациясының (UWW) ресми сайтында әйелдер арасындағы жаңартылған әлемдік рейтинг жарияланды, деп хабарлайды BAQ.KZ тілшісі.
Қазақстанның үздік балуаны Жәмиля Бақбергенова өз көшбасшылық орнын сақтап қалды.
2025 жылдың сәуір айынан бері 72 келі салмақ дәрежесінде көш бастап келе жатқан Жәмиля қазіргі таңда 51 000 ұпаймен рейтингтің бірінші сатысында тұр. Бұл оның халықаралық ареналардағы тұрақты әрі жоғары нәтижелерінің дәлелі. Екінші орында Ами Иши (Жапония) – 45 000 ұпай, Болортунгалаг Зоригт (Моңғолия) – 34 700 ұпаймен үшінші орынға тұрақтады.
Еске сала кетейік, Жәмиля Бақбергенова – Қазақстан әйелдер күресі құрамасының көшбасшысы. Биыл ол Иордания астанасы Амманда өткен Азия чемпионатында төртінші рет құрлықтық додада топ жарып, чемпион атанды.
