«Путин есінен адасқан тәрізді». АҚШ Президенті мәлімдеме жасады
Фото: Ашық дереккөзАҚШ Президенті Дональд Трамп Владимир Путиннің әрекеттеріне алаңдаушылық білдіріп, Ресейге қарсы жаңа санкциялар енгізу мәселесін қарастырып жатқанын мәлімдеді. Бұл туралы ол Нью-Джерси штатында журналистерге берген сұхбатында айтқан, деп хабарлайды Egemen.kz.
Кейінірек Truth Social желісінде жарияланған жазбасында Трамп Путинге қатысты ашық мәлімдеме жасаған.
«Менің әрдайым Ресей президенті Владимир Путинмен қарым-қатынасымыз жақсы болды, бірақ оған бірдеңе болды. Ол есінен адасқан тәрізді. Көптеген адамды негізсіз өлтіріп жатыр, бұл жерде әңгіме тек сарбаздар туралы емес. Украина қалаларына зымырандар мен дрондарды ешқандай себепсіз жіберіп жатыр», деді АҚШ президенті.
Айта кетейік, бұл мәлімдемелер Украинаға жасалған шабуылдан кейін жарияланған. 25 мамырға қараған түні болған әуе соққысының салдарынан украиналық биліктің мәліметінше, 12 адам қаза тапқан.
