Адал еңбек абыройға бөлейді

Бұл туралы Президент «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдау­ында: «Біз жұмысшы мамандықтарын дәріптеу арқылы қоғамда еңбекқор және нағыз маман болу идеясын насихаттаймыз. Бұл «Адал азамат – Адал еңбек – Адал табыс» қағидатына толық сай келеді. Қоғамда еңбекқорлық, кәсібилік сияқты қасиеттер өте жоғары бағалануға тиіс. Өз кәсібін жетік меңгерген мамандар ұлт сапасын арттырады. Жұмыстың жаманы жоқ, кез келген еңбек – қадірлі. Ең бастысы, әркім жауапкершілікті терең сезініп, өз міндетін сапалы атқаруға тиіс. Сонда ғана еліміз дамудың сара жолына түседі», деп атап көрсеткен болатын.

Осы орайда Қазалы қалалық кітапханада «Адал еңбек, алғыр ой – анық досың біліп қой» атты Қазалы аграрлы-техникалық колледжінің өн­діріс­тік оқыту шеберлері және колледж студенттерінің қатысуымен кездесу кеші өткізілді. Шараға «Автомобиль техникалық пайдалану және жөндеу», «Ауыл шаруашылығын электрмен қамтамасыз ету», «Дәнекерлеу ісі» мамандығы бойынша өндірістік оқыту шеберлері қатысты.

Кеш барысында өндірістік оқыту шеберлері Нұрғабыл Мырзабаев, Шынжырбай Жадырасынов және колледж студенттері Нұрхан Серікқали, Мақсат Аралбаев және өзге де қатысушылар, мамандықтары бойынша жеткен жетістіктері мен алдағы арман-мақсаттары туралы ой-пікірлерін ортаға салды. Кеш соңында белсене қатысушылар мен қонақтарға кітапхана ұжымының атынан кітап және заттай сыйлықтар таратылды.