Үкімет авторлық құқық мәселесіне мемлекеттік монополия енгізу ұсынысын қолдамады
Мәжіліс депутаттарының креативті индустрияны дамытуға арналған заң жобасы арқылы авторлық құқық мәселесін мемлекет монополиясына өткізу туралы ұсынысын қолдамай отыр. Бұл туралы Әділет министрлігінің Kazinform сауалына жолдаған жауапта айтылған.
Фото: pexels.com- «Қазақстан Республикасының кейбір заңнамалық актілеріне креативті индустрияларды қолдау және дамыту мәселелері бойынша өзгерістер мен толықтырулар енгізу туралы» Қазақстан Республикасының Заңының жобасында Қазақстан Республикасы Парламент Мәжілісінің депутаттары ұжымдық басқару саласында мемлекеттік монополияны енгізуді ұсынды. Заң жобасы бойынша Қазақстан Республикасы Үкіметінің қорытындысында бұл ұсыныс қолдау тапқан жоқ, - деп жазылған мәліметте.
Дегенмен бұл мәселеге нүкте қойылды деген сөз емес. Министрлік ұсынған мәлімет бойынша, ертең Алматыда Әділет вице-министрі Ботагоз Жакселекова мен Зияткерлік меншік құқығы комитетінің төрағасы Шолпан Абдреева авторлық қоғам өкілдерімен кездесіп, осы мәселені талқылайды. Бұған дейін Шәмші әулеті композитор әндеріне сөз жазған авторлардың ұрпағына іздеу салатынын жазған едік.
