Смайылов: ҚТЖ-ның қарызы 2,9 трлн теңгені құрады және әлі де өсуде
Фото: ҚТЖҚазақстан темір жолы ұлттық компаниясы қарызын толық төлеуге қабілеті жоқ. Бұл туралы Жоғары аудиторлық палата төрағасы Әлихан Смайылов мәлімдеді.
Оның айтуынша, бүгінде ҚТЖ кредиттік тәуекелдің «қызыл» аймағында тұр.
Оның борышы 2024 жылдың басында 2,9 трлн теңгені құрады және әлі де өсуде. Жалпы борыштың 45%-ы немесе 1,3 трлн теңгесі бұрын алынған борыштық міндеттемелерді қайта қаржыландыруға бағытталған. Қаржылық және техникалық жай-күйді сауықтырудың нақты мерзімдерін айқындап, ҚТЖ компаниялар тобының шығындарын оңтайландыру қажет, деді ол.
Бұл ретте, «Самұрық-Қазына» акционерлік қоғамының қазіргі корпоративтік басқару әдістері мен даму стратегиясы еліміздің Ұлттық теміржол компаниясының дағдарысын болдырмауға қабілетсіз. Активтердің жай-күйінің нашарлауы, борыштардың өсуі және оларды уақытылы қайтару мүмкіндігінің болмауы басқарудағы түбегейлі өзгерістерсіз ҚТЖ-ны дефолтқа ұшыратады, деді Смайылов. Ал соңғы төрт жылда теміржол саласын дамытуға шамамен 2 трлн теңге, соның ішінде бюджет қаражаты есебінен 332 млрд теңге жұмсалған.
