Ауданда қаржылық сауаттылықты арттыруға бағытталған тегін оқыту курсы басталды
Өткен жылы «AMANAT» партиясы Halyk Bank-пен бірге азаматтардың қаржылық сауаттылық деңгейін арттыруға бағытталған «Қарызсыз қоғам» жобасын іске қосқан болатын. Сол уақытта 65 мыңнан астам азамат қаржылық сауатын жетілдіру курстарынан өтті.Аталған партиялық жоба Мемлекет басшысы Қасым-Жомарт Тоқаевтың ерекше қолдауына ие болып, Президент оның ауқымын жалпыхалықтық деңгейде кеңейтуді тапсырды. Осыған сәйкес «AMANAT» партиясы ҚР Үкіметі және Ұлттық банкпен бірлесе жобаны жүзеге асыруда.
Өңірдегі «Қарызсыз қоғам» жобасының оқыту кезеңі бойынша кеше ауданымызда оқыту курсының алғашқы күні басталды. Оқу курстары ең алдымен аудан орталығы Әйтеке би кентінде басталып, оған кент және Ғ.Мұратбаев ауылының тұрғындары қатысуда.
«Биыл өңірімізде жобаның оқыту кезеңі басталды. Жоба көпшіліктің қолдауына ие болып, тиімділігін көрсетуде. Ал бүгін өздеріңізбен бірге ауданымызда оқыту курсының алғашқы күнін бастағалы отырмыз. Бүгінгі қоғамда кез келген азаматтың қаржылық сауатының болуы ауадай қажет. Сондықтан баршаңызды оқыту курсына белсенді қатысып, осы бағытта толғандырып жүрген сұрақтарыңызға нақты жауап алуға шақырамын», - деген партия филиалының төрағасы Ғазиз Әліш оқыту жұмыстарына сәттілік тіледі.
Осы күні Қазалы қаласында да оқу курстары басталып кетті. Қалалық мәдениет Үйінде қала және Абай ауылының тұрғындары қаражатты тиімді басқару және шығындарды оңтайландыру бойынша дәріс алуда.
Алғашқы сабаққа арнайы қатысқан партия филиалының Атқарушы хатшысы Нұрғиса Жалғасбаев пен қала әкімі Қайрақбай Орынбасаров партиялық жобаның тиімділігіне тоқталып, азаматтардың қаржылық дағдыларын нығайтуға ықпал ететін маңызды жоба екенін атап өтті.
Айта кетейік, аудан бойынша оқыту курстарын қаржылық сарапшылар Балдырған Мамен мен Айгүл Төлекова жүргізуде. Оқыту жұмысы әр топ бойынша 5 күн тегін жүреді. Алдағы апталарда оқыту жұмыстары жоспарлы түрде ауылдық округтерде ұйымдастырылатын болады.
#AMANAT
Пікір 1