Көшпелі медициналық кешен кешелі бері Қ.Пірімов, Жалаңтөс батыр ауылдарын аралап, ауыл тұрғындарына сапалы медициналық көмек көрсетуде.

Бүгін аудан әкімі Мейрамбек Шермағанбет Жалаңтөс батыр ауылына жасаған жұмыс сапары барысында ауылдық дәрігерлік амбулатория жанындағы медициналық кешенде тұрғындарға қызмет көрсетіп жатқан дәрігерлермен кездесті.

Аудан басшысы медициналық кешеннің аудан орталығындағы емханаға шалғай жерде орналасқан, өздігінен келе алмайтын, мүмкіндігі шектеулі науқастар үшін үлкен көмек екенін айтып, дәрігерлерге бұл бағыттағы жұмыстарды әрі қарай ауданға қарасты барлық елді мекендерде жалғастыруды тапсырды.

Айта кетейік, жылжымалы медициналық кешен пациенттерге толық медициналық тексеру жүргізу үшін қажетті барлық заманауи цифрлық зерттеу құрылғыларымен жабдықталған. Атап айтқанда: Жалпы қабылдау аймағы: жалпы тәжірибелі дәрігер: акушер-гинеколог, окулист, ЛОР, хирург, онколог, травматолог, стоматолог, эндокринолог, гастроэнтеролог, невропатолог, ревмаолог, кардиолог кабинеттері мен анализдер қабылдау және глюкометр, гематологиялық анализатор жүргізу аймағы, дәріханалық пункт, УДЗ және ренгенологиялық зерттеулер жүргізетін арнайы қорғасын сәулелі диагностика бөлмесі бар, онда басқаларға қауіпсіз рентген жасауға болады. Жылжымалы медициналық кешен арнайы мамандармен түгел қамтылған.

 

Тұрғындардан түрлі дерттер анықтап, асқынудың алдын алу мақсатында жұмыстар жүргізіп жатқан медициналық кешеннің жұмысы алдағы уақытта басқа да ауылдарда жалғасатын болады.