Ауданда 407 оқушы грант иегері атанды
2020-2021 оқу жылында Қазалы ауданы бойынша 697 түлек орта білім беру ұйымын тәмамдады.Биылғы жылы ұлттық бірыңғай тестілеуге қатысқан 618 түлектен 534-і мемлекеттік грант конкурсына қатысуға өтініш білдірген. Оның ішінде 407-сі грант иегері атанды.Гранттардың бөлінісі бірнеше басым бағыттарға қарай тағайындалды. Атап айтқанда, педагогика саласы мен медицина, ауыл шаруашылығы және техникалық мамандықтарға гранттар алынған. Аудан бойынша мемлекеттік грант иеленген 407 түлектің басым бөлігі педагогикалық және техникалық мамандықтарды таңдаған.
Атап айтқанда, 157 талапкер педагогикалық, 49 талапкер медициналық бағытқа, 68 түлек техникалық және 24 түлек ауылшаруашылығы мамандықтарына оқуға түсті. Сонымен қатар, 109 түлек басқа да бағыттағы мамандықтарға тапсырған.
Айта кетейік, 2020-2021 оқу жылының қорытындысы бойынша «Алтын белгі» иегерлерінің 24 – і, яғни 32%-ы педагогикалық бағыттағы мамандықтарға оқуға қабылданып отыр.
Қазалы ауданының білім бөлімі
