Қазалыда мектеп бітірушілерге аттестат тапсырылды
Қазалы ауданындағы мектеп бітірушілерге аттестат тапсырылды. Салтанатты шара күшейтілген санитариялық-дезинфекциялық режиммен, бекітілген тәртіпке сәйкес өтті.Бүгін Ы.Алтынсарин атындағы №204 мектепте соңғы қоңырау шарасы мен аттестат алу рәсімі біріктіріліп өткізілді.
Түлектерді мектеп директоры Төребай Шермаханов, мтематика пәнінің мұғалімі Көбейсін Демеубаев құттықтап, аттестаттарын тапсырды. Сондай-ақ, мектептегі ата-аналар комитетінің төрайымы Ұлдай Рашева, қамқоршылық кеңестің төрағасы Аманкелді Дінахметов оқушылар мен ұстаздарды онлайн құттықтап, сәттілік тіледі.
Биыл Ы.Алтынсарин атындағы №204 мектептен 39 оқушы түлегелі отыр. 4 оқушы мектепті үздік бітірсе, 1 оқушы географиядан облыстық олимпиаданың жеңімпазы атанды.
Ал, ауданда биылғы оқу жылында 632 оқушы мектепті аяқтады. Түлектеріміздің ішінде «Алтын белгіге» 54 оқушы бітірсе, 31 оқушы «Үздік аттестат» иегері атанды. Сондай-ақ, ауданда мектеп бітірушілердің 83,4 пайызы ҰБТ-ға қатысады деп жоспарлануда.
"Қазалы" ақпарат
