Құрбандыққа шалынатын малдың бағасы тағы шарықтай ма?
Құрбан айт мерекесінде мұсылмандар Құдайдан амандық тілеп, мал құрбандыққа шалады. Олар соятын қойларын алдын ала тапсырыс беріп, алдырып қояды екен.
Шымкент қаласының тұрғыны Мақұлбек қажы Медеубековтің айтуынша, ол қойды алдын ала көріп, кейін айт намазынан соң алып кетеді екен.
"Жағдайы жетпейтін жандарға құрбан шалу міндетті емес, ал қалтасы көтеретін болса, мұны істеуге міндетті",- дейді Мақұлбек қажы.
Құрбан айт кезінде құрбан шалатын малдың бағасы қатты артып кетеді деп айтуға да болмайды. Кәсіпкер Сейдулла Гультураевтың сөзінше, Құрбан айт мерекесінде Шымкенттік тұрғындар 20-30 мың теңге көлемінде қой сатып алуға мүмкіндіктері бар.
"Бір қойдың бағасы бір келі еттің бағасына байланысты өлшенеді. Қазір базарларда бір келі қой етіне 1350 теңге сұрайды. Біз де бағаны көтермейміз", - дейді кәсіпкер.
Мұсылмандар 21-23 тамыз аралығында болатын Құрбан айт мерекесінде дастархан жайып, құрбандық шалады. Бұл мейрамда араз туыстар татуласып, ағайындардың да басы бірігеді.
