Бұған дейін Оқу-ағарту министрлігі құрған жұмыс тобына оқу жылын ұзартуға бірнеше ұсыныстар келіп түскен. Ұсыныстар легіне көз жүгіртсек, маусым айының соңына дейін ұзарту және оқу жылын 20 тамыздан бастау мәселесін қарау туралы өтінішпен министрлікке жүгінген.

Себебі Қазақстан әлемдегі жазғы демалысы ең ұзақ, 130 күнді құрайтын елдер қатарына кіреді. Ал басқа елдерде каникул мерзімі – 80 күннен 100 күнге дейін екен.

Оның үстіне 5 күндік оқу аптасына көшкен кезде оқу күндерінің саны бірден 34 күнге азайды. Осылайша, орта есеппен алғанда, Қазақстандағы оқу күндерінің жалпы саны шамамен 150 күн болса, дамыған елдерде бұл шамамен 200 күн.

Салыстырмалы түрде қарасақ, Германия, Англия және Жапонияда жазғы демалыс – 7 апта, Польша, Қытай және Оңтүстік Кореяда – 7-9 апта, Финляндия, Венгрия, Швецияда – 9-11 апта, Латвия, Италия және Португалияда – 11 апта, ал Қазақстанда ең ұзақ – 14 аптаға созылады.

Сарапшылар қосымша оқу апталарының қосылуы күнделікті сабақтың санын, яғни мұғалімнің де, оқушының да күнделікті оқу жүктемесін азайтатынын айтады.

– Мен негізі бұл өзгерісті ата-ана ретінде толыққанды қолдамаймын. Иә, бір ай емес бір аптаның арысы не, берісі не деп атүсті қараймыз. Дегенмен баланың үш тоқсан бойы алған білімін бір апта оқуға қатынауы толықтырады деп ойламаймын, – дейді Салтанат Қанаева.

PS: Жоғарыдағы салыстырмаға мән берсеңіз, әлемдегі ең ұзақ жазғы демалыс бізде ғана. Не болса да «Болар іс болды, бояуы сіңді» демекші, қатқан мұзды қайта жібіту мақсатымыз емес. Бірақ қадамы қарышты, озық мемлекеттермен текетіресіп, білім дәрежеміздің аспандауы үшін бес күн тіпті аз секілді. Сол үшін оқу жылын әлі де созған абзалырақ болар ма еді?!