Рамазан айында берілетін пітір-садақа мөлшері белгілі болды
Қазақстан мұсылмандары діни басқармасы биылғы пітір-садақа мөлшерін белгіледі деп хабарлайды stan.kz ақпарат агенттігі.Рамазан айында берілетін пітір-садақа мөлшері қандай болатынын Бас мүфти Наурызбай қажы Тағанұлы айтты. Елордада өткен баспасөз мәслихатында ол пітір 2 келі ұнның орташа бағасымен есептелгенін түсіндірді.
“Биыл пітір мөлшері 535 теңге болып белгіленді. Пітір садақаның мөлшері еліміз бойынша 2 келі ұнның орташа бағасымен есептелді. Ал ұнның бағасы ҚМДБ-ның қала және облыс өкілдіктерінің берген мәліметі негізінде анықталды. Пітір садақасын құрма, мейіз бағасымен де беруге болады”, - деді Бас муфти.
Айта кетейік, барша мұсылмандары үшін қасиетті Рамазан айы 23-ші наурызда басталады.
