Қазақстандықтар балықты өте аз тұтынады
Дүниежүзілік денсаулық сақтау ұйымы бір адамға жылына кемінде 16 келі балық өнімдерін тұтынуды ұсынса, ал Қазақстанда бұл көрсеткіш 4 келіден аз. Бұл туралы Парламент Мәжілісіндегі Үкімет сағатында ҚР Экология, геология және табиғи ресурстар министрі Серікқали Брекешев мәлем етті, деп хабарлайды inbusiness.kz."Қазақстан жан басына шаққанда, балықты аз тұтынумен сипатталатынын атап өткен жөн. Дүниежүзілік денсаулық сақтау ұйымы бір адамға жылына кемінде 16 келі балық өнімдерін тұтынуды ұсынады. Қазақстанда бұл көрсеткіш 4 келіден аз", – деді министр.
Экономикалық зерттеулер институтының дерегінше, көршілес Ресей мен Қытайда бір адам сәйкесінше 23 және 43 келі тұтынады. Демек өнім экспорттауға болатын ең ірі нарықтар елімізге жақын орналасқан.
"Осылайша, көрші елдердің шекаралас аудандарын ескере отырып, балық өнімдерін экспорттау үшін әлеуетті ниша 3 млн тоннадан астам болуы мүмкін", – деді министр.
