Ағымдағы жылы 200-ден астам мектеп түлегі Ұлттық бірыңғай тестіні ағылшын тілінде тапсыруға ниет танытып отыр. Бұл туралы халықпен есептік кездесу өткізген ҚР Білім және ғылым министрі Ерлан Сағадиев айтты, деп хабарлайды ҚазАқпарат тілшісі.

«Ағымағы жылы Ұлттық бірыңғай тест тапсыру ережесі өзгерген жоқ. Дегенмен, тест тапсырушыларға ыңғайлы болуы үшін аздаған түетулер енгізілді. ҰБТ бес пәннен тұрады: үшеуі міндетті және екеуі таңдауы бойынша. Бүгінгі күні тест тапсырмалары базасының 50 пайызы жаңартылды. Сонымен қатар ҰБТ-ны ағылшын тілінде де тапсыруға мүмкіндік беріледі. Қазірдің өзінде шамамен 200 адам жазылды», - деді министр.

Мұнан бөлек ол әлеуметтік жағынан аз қамтылған отбасылардың балалары бүгінгі күні 100 пайыз ыстық тамақпен тегін қамтамасыз етілгендігін айтты. Сонымен қатар мектептен шалғай жерде тұратын оқушылардың 98 пайызын білім ордасына жеткізу қамтамасыз етілген. «Бірнеше жыл бойы жетім балалардың республикалық базасы жұмыс істеп тұр. Бұл жерден ата-анасының қамқорлығынсыз қалған балаларды патронаттық тәрбиелеу, асырап алуға беру шаралары жүргізіледі. Соңғы жылдары мұндай салалардың саны 1 мыңға қысқарды», - деді Ерлан Сағадиев.