Халықтың 54,5% тұмауға қарсы екпе алды
Денсаулық сақтау министрі Алексей Цой 1,4 млн-ға жуық қазақстандық тұмауға қарсы екпе алғанын айтты, деп хабарлайды inbusiness.kz. «Тұмауға қарсы вакцинация жалғасып жатыр. Бүгінгі таңда шамамен 1 млн 380 мың адам немесе халықтың 54,5% егілді. Вакцинациямен республикалық көрсеткіштен жоғары қамту 7 өңірде байқалды. Оның ішінде Түркістанда тұмауға қарсы вакцинамен халықтың 85%-ы, Нұр-Сұлтан, Шымкент қалалары мен Ақмола және Қызылорда облыстарында 60%-дан астамы, Алматы қаласында және Шығыс Қазақстан облысында 55%-дан астамы қамтылды», – деді министр. Алексей Цойдың сөзінше, халықты коронавирус инфекциясына қарсы вакциналау да үздіксіз жүріп жатыр. «Бірінші компонент бойынша 8 млн-нан астам адам екпе алды. Бұл вакцина алуға тиісті халықтың 70,7%-ы немесе жалпы халықтың 42,7%-ы. Екінші компонент бойынша екпе алуға тиісті халықтың 63%-ы немесе жалпы халықтың 38%-ы қамтылып, 7,1 млн адам екпе алды», – деді Алексей Цой.
