Көшең таза болса, жүзің жарқын
Аудан әкімі өкімімен көктемгі санитарлық-тазалық жұмыстары екі айға ұласады.Көгілдір көктемнің алғашқы сенбілігі Ұлыстың ұлы күні – Наурыз мерекесіне орай өтті. Сенбілікке аудан әкімі М.Нәлхожаұлынан бастап мемлекеттік мекеме қызметкерлері, дәрігерлер, теміржолшылар, мұғалімдер мен жергілікті тұрғындар қатысты. Олар көше бойларын, су жүретін арықтарды күл-қоқыстан тазартты. Сенбілікке ауданның барлық округтері қамтылды. Тазалық жұмыстарына арнайы техникалар да жұмылдырылды.
Мұнымен қоса, дәл осы үрдіс Қазалы қаласында да жалғасын тапты. Айта кетерлігі, ондағы мекемелер мен кәсіпорындардан барлығы 225 адам сенбілікке шығып, 3 Газ-53 көлігі және 3 трактор жұмысқа тартылды. Қазалы қаласындағы 1,4 шақырым көше бойындағы аяқ су жүретін арық іші мен 2,260 шақырымды құрайтын көше жолдарының бойындағы бордюрлердің жиегі тазаланып, сенбілік өз дәрежесінде өткізілді.
Екі айлық барысында аумақтарды тазалаумен бірге тал отырғызу, гүл егу жұмыстары жүргізіледі. Жолдар мен аялдамалар, кіші сәулет ескерткіштері, ғимараттар маңдары қалыпқа келтірілмек.
Сергек басталған серпінді сенбілік 10 наурыздан 12 мамырға дейін жалғасын табады.
Е.ТАБЫНБАЕВ
