Кеше кешкісін Алматы қаласы Алатау аудандық полиция басқармасына Гүлнұр Нұртазаның жоғалып кеткендігі туралы құрбысынан арыз түскен. Алматы қалалық Полиция департаментінің хабарлауынша, жоғалған бойжеткен табылды.

«Белгілі болғанындай, ару осыдан бір күн бұрын ешкімді ескертпестен Тараз қаласына кетіп қалған. Ол байланысқа шықты. Аман-есен», деп хабарлады департамент өкілі.

Еске салайық, бұдан бұрын бойжеткеннің қиын жағдайға тап болғаны туралы жазған болатынбыз. Әлеуметтік желіде Қызылорда аруының дәмханада ыдыс жуып жүрген видеосы тарады. Кейін Гүлнұрдың отбасындағы жалғыз қыз екені, 15 жасында әкесі жүрек талмасынан, өткен жылы қыркүйекте анасы коронавирустан қайтыс болғаны туралы дерек анықталды. Сондай-ақ құрбысы Гүлнұрдың жүрегінде ақау барын, арасында мұрнынан қан ағып талып қалатынын айтқан еді.

Айта кетейік, Гүлнұр Нұртаза «Қызылорда аруы-2017» байқауының жеңімпазы. Қазіргі уақытта Алматыда жұмыс істейді.