Қазір жастардың есірткі пайдалануына тікелей жол интернет болып отыр. Қазір интернет-дүкендер telegram арнасы арқылы жүзеге асырылады. Ол қосымшаны кез келген смартфонға көшіріп алуға болады. Жастарға курьер, хабарландыруларды тарату сынды жұмыстарын ұсынуы мүмкін. Синтетикалық есірткілердің кеңінен тарауы олардың арзан бағасына байланысты болып отыр. Жастар да кішкене жұмыс істесек, ештеңе болмайды деп ойлайды. Көңіл көтеретін газ есірткінің қатарына жатпайды. Олардың айналымын полиция бақыламайды. Себебі көңіл көтеретін газ анестезия үшін медициналық мақсатта қолданылады, - деді ол.

Нұрғалиев айтқандай, медициналық тұрғыда бұл зат науқасқа белгілі бір дозада ғана беріледі.

Қазір денсаулық сақтау министрлігі қатты әсер ететін препараттардың тізімін әзірледі. Оның құрамында азот та бар. Сондықтан көңіл көтеру газы бақылауға алынады. Қазақстанда есірткі сататын және насихаттайтын интернет сайттарға қылмыстық жауапкершілік қарастырылған. Граффити арқылы есірткіні насихаттайтын адамдар болса, олар қылмыстық жауапкершілікке тартылады, - деді Нұрғалиев.

Осы орайда басқарма бастығы ата-аналарға жасөспірімдердің интернетте қарайтын сайттарын назарда ұстауға шақырды.

Нашақорлық әлеуметтік әлжуаз топтардың проблемасы ғана емес, кез келген отбасының мәселесіне айналды. Қазір пандемия кезінде онлайн күшейген соң, кез келген адамның қолында смартфон жүреді. Сондықтан балалардың қарап жүрген дүниелерін, сайттарын үнемі қадағалауда ұстау керек. Қылмыстық жауапкершілік 14 жастан басталады, - деді ол.