Зейнетақы қорының жүйесі түсіндірілді
Әйтеке би кенттік клубында «Бірыңғай жинақтаушы зейнетақы қоры» АҚ-ның Қызылорда облысы әкімдігімен өзара меморандум талаптарын жүзеге асыру мақсатында жиын өтті. Оған тиісті сала қызметкерлерімен бірге «Бірыңғай жинақтаушы зейнетақы қоры» АҚ облыстық филиалының өкілдері Ықыласбек Әлімбетов, Жанар Жәрімбетова, аудандық БЖЗҚ қызмет көрсету орталығының басшысы Ринат Аяпбергенов қатысты. Басқосуда тұрғындардың сауаттылығын арттыру және оларды жинақтаушы зейнетақы жүйесіне тарту бағытында ақпараттық түсіндірме жұмыстары жүргізілді. Зейнетақы жүйесін одан әрі жаңғыртудың 2030 жылға дейінгі тапсырмаларды орындау және міндетті зейнетақы жарналарының жүйелі түрде түсуі мен көлемін ұлғайту жайы айтылды. Сондай-ақ, 2016-2018 жылдар ішінде қолданысқа енетін зейнетақы заңнамасындағы өзгерістерге және төлемдердің ай сайын берілу кестесіне ауысу себептері мен базалық зейнетақыны тағайындау тәртібі жан-жақты талқыланды.
Айта кетейік, салымшыларға зейнетақы шоттарын ыңғайлы және заманауи тәсілдермен бақылауға мүмкіндік беретін «Электрондық қызметтер: жеңіл, жылдам және ыңғайлы» жобасы қосылды. Оның смартфонға арналған телефон қосымшасын жүктеп алуға болады.
Айнұр ҚАЗМАҒАМБЕТОВА
