Кондиционердің өзінен тұмаулап қалу мүмкін емес. Ауа салқындататын техника немесе жел тұмауды шақырмайды. Тұмау тек вирустар себебінен пайда болады. Алайда суық ауа ағза қорғанышын уақытша әлсіретіп жіберуі мүмкін. Сол кезде ағза микробтарға қарсы тұра алмайды. Бірақ оған кондиционер кінәлі екені туралы нақты дәлелдер жоқ.

Сонымен қатар құрғақ ауа шырышты қабыққа ауру қоздырғыштардан қорғануға кедергі келтіреді деген де болжам бар. Ал кондиционер ауа ылғалдығын төмендетеді.

Әдетте, кондиционер тұрған бөлмені өте сирек желдетеді. Сондықтан ауадағы вирустар шоғырлануы өсіп, жұқпа жұқтырып алу қаупі жоғарылай түседі.

Кондиционер сүзгісі шынымен де шаң, аллерген және қауіпті микроағзаларды жинайды. Солардың себебінен адамның ауырып қалуы әбден мүмкін. Бірақ мұндай жағымсыз жағдай орын алмас үшін тазалық сақтау жеткілікті. Кондиционер сүзгісін уақытылы жуып немесе ауыстырып тұру керек.

Ылғалдың жетіспеуі тұмау ауруларының, тері және өкпе мәселелерінің даму қаупін жоғарылатады. Ауа кондиционер себебінен құрғап кетпес үшін үйге суы бар ыдыстар қойып қойыңыз және душтан соң есікті ашық қалдырыңыз. Әрине, ең дұрысы – ауа ылғалдандырғыш сатып алу. Өмірге қолайлы ылғалдылық деңгейі – 45-55%.

Жылы күндері бөлме температурасы 22-25 градус болуы керек. Ыстық күні көшеден келген бойда жылдам салқындағыңыз келіп тұрса да кондиционер желін күшейтіп қоюдың қажеті жоқ. Себебі ағза ыстықтан кейін суыққа бейімделіп үлгермейді. Дала мен бөлме температурасының айырмашылығы көп болған сайын ол ағза үшін күйзеліс болып келеді.