Елордада тәжікстандық өнімдер мен бұйымдардың жәрмеңкесі өтіп жатыр
Фото: Астана қаласы әкімдігіЕлордада Тәжікстан Республикасының Соғды облысынан әкелінген ауылшаруашылық өнімдері мен қолөнер бұйымдарының жәрмеңкесі ашылды, деп хабарлады Elordainfo.kz қала әкімдігіне сілтеме жасап.
Тәжікстаннан келген кәсіпкерлер 1 мың тоннадан астам ауылшаруашылық өнімдерін сатылымға ұсынды.
Оның ішінде жаңа піскен жеміс-жидек пен көкөністер, кептірілген жемістер, жаңғақтар және бақша дақылдары бар.
Келушілер ғасырлар бойғы дәстүрді сақтаған тәжік қолөнерінің бірегей бұйымдарын сатып ала алады.
Жәрмеңкеде ұлттық тағамдар да сатуға ұсынылған. Күн сайын 10 қазанда кемінде 1 тонна палау дайындалып, 6 тандырда 5 мыңнан астам нан мен самса пісіріледі.
Сонымен қатар, ұйымдастырушылар Тәжікстаннан келген әртістер мен шығармашылық ұжымдардың қатысуымен ерекше концерттік бағдарлама әзірледі.
Іс-шараның басты мақсаты – шағын және орта бизнестегі мемлекетаралық ынтымақтастықты дамыту мен қолдау, сондай-ақ екі ел арасындағы мәдени және экономикалық байланысты нығайту.
«Бұл – тек базар емес, нағыз мәдени оқиға. Мұндағы атмосфера сондай ерекше, шынымен де шығыс базарында жүргендей әсер қалдырады. Біз мұнда тек өнімдер мен кәдесыйлар алып қана қоймай, тәжік мәдениетінің рухын сезіндік», – деді іс-шара қонақтарының бірі.
Жәрмеңке 16 тамыз күні сағат 11:00-ден 19:00-ге дейін, ал 17 тамызда 10:00-ден 19:00-ге дейін "Барыс Арена" мұз сарайының алдындағы алаңда (Тұран даңғылы, 57) өтеді.
