Ғалымдар инсульттен кейін миды қорғауға арналған жаңа тәсілді ұсынды
Фото: Freepik
Кембридж университетінің ғалымдары инсульттен кейінгі ми тіндерінің зақымдануын айтарлықтай азайтатын жаңа препаратты таныстырды, деп хабарлайды El.kz интернет порталы.
Cardiovascular Research ғылыми журналында жарияланған зерттеу нәтижелеріне сәйкес, зертхана жағдайында тышқандарға енгізілген aDSM (қышқыл малонат) атты зат мидағы зақымданған тіндердің көлемін 60 пайызға қысқартқан.
Ғалымдар инсульттен кейінгі негізгі проблемалардың бірі – тек қан ағымының тоқтауы емес, оның кенеттен қалпына келуі екенін атап өтті. Қалпына келген оттегі зақымдалған аймаққа түскен кезде, жасушаларда тізбекті реакция жүріп, белсенді оттек радикалдарының бөлінуіне әкеледі. Бұл процесс ДНҚ құрылымын бұзып, қабынуды күшейтеді және тіпті тромбты алып тастау (тромбэктомия) сәтті орындалған жағдайда да жағымсыз салдарға әкелуі мүмкін.
Зерттеу барысында ми тінінің зақымдануына янтар қышқылы (сукцинат) тотығу процесі себеп болатыны анықталды. ADSM препараты осы процесті тежей отырып, гематоэнцефалдық бөгеттен еркін өте алады, бұл оның ерітінді формасының жеңіл қышқылдық сипатымен байланысты.
Ғалымдар зақымдалған тін аймағы неғұрлым аз болса, науқастың сөйлеу, қозғалу және когнитивтік функцияларын сақтау мүмкіндігі соғұрлым жоғары болатынын айтады.
Қазіргі уақытта бұл әдіс Camoxis Therapeutics стартапы аясында сынақтан өтіп жатыр. Болашақта бұл препарат инсульттен бөлек, инфаркт пен ағзаларды трансплантациялау кезінде де қолданылуы мүмкін.
Айта кетейік, бұған дейін зерттеушілер көздің түбін сканерлеу арқылы жүрек талмасы мен инсульт қаупін болжауға мүмкіндік беретін жасанды интеллект алгоритмін әзірлеген болатын. Бұл жүйе жүрек-қан тамырларындағы өзгерістерді анықтап, ауру қаупін 70 пайыз дәлдікпен бағалауға қабілетті.
