Адам саудасы тыйылар емес: жарты жылда 285 іс тіркелді

Бүгін — Дүниежүзілік адам саудасымен күрес күні. Елімізде жыл басынан бері адам саудасына қатысты 285 қылмыстық іс тіркелген. Оның 28-і кәмелет жасына толмаған балаларға байланысты.

Фото: Canva

Ал былтыр дәл осындай 445 іс қозғалған. Бұл — Құқықтық статистика және арнайы есепке алу органдарының порталында көрсетілген мәлімет.

— Қылмыстық кодексте адам саудасына байланысты қылмыс үшін жауапкершілік 8-бапта көзделген (116-бап, 125-бап 3-бөлім 2-тармақ; 126-бап 3-бөлім 2-тармақ; 128, 134, 135, 308, 309). Осы баптар бойынша қылмыскердің мүлкі тәркіленеді, ең жоғарғы жаза — 18 жылға дейін бас бостандығынан айыру. Мұндай жаза өте қатал және басқа ауыр қылмыс үшін көзделген жазамен сәйкес келеді, — дейді ІІМ мамандары Kazinform-ге ресми сауалына берген жауабында.

Мамандар бұл қылмыс, ең алдымен қандай адамдарды нысанаға алатынын айтты.

Мұндай жағдайларға тап болуға ықпал ететін факторлар:

• ақпараттың жеткіліксіздігі

• құқықтық сауаттылықтың төмендігі

• арзан жұмыс күшіне сұраныс

• интернеттің әсері

• жеңіл ақша табуға және «әдемі өмір сүруге» ұмтылу

• сондай-ақ шетелдіктердің заңсыз мәртебесі және басқа да себептер.

Адам саудасының құрбандарына мемлекеттік бюджет есебінен көмек көрсетіледі.— Зардап шеккендерге 8 түрлі қызмет ұсынылады: әлеуметтік-тұрмыстық, медициналық, психологиялық, педагогикалық, еңбек, мәдени, экономикалық және құқықтық көмек. Осындай қызметтер қылмыстық іс қозғалған-қозғалмағанына қарамастан көрсетіледі. Бұдан бөлек, адам саудасының құрбаны азаматтық заңнама шеңберінде материалдық және моральдық зиянды өтеуді талап етуге құқылы. Бұл туралы оны сотқа дейінгі тергеп-тексеруді жүргізіп жатқан тұлға міндетті түрде хабардар етеді, — делінген жауапта.Айта кетейік, бірер күн бұрын ІІМ адам саудасына қатысы бар екі қылмыстық топты ұстады.