Қазақстанда фитобақылау ережелерін бұзу фактілері көбейді
Жарты жылда 130 миллион теңгеден астам айыппұл салынды
Фото: ЖИ арқылы жасалды/ChatGPT
2025 жылдың алғашқы жартыжылдығында елімізде фитосанитариялық бақылау саласында 1 342 заңбұзушылық анықталып, 130,7 миллион теңге көлемінде айыппұл салынды. Бұл туралы ҚР Ауыл шаруашылығы министрлігі мәлімдеді, деп хабарлайды Azattyq Rýhy.
1300-ден аса жағдай тіркелді
Министрлік дерегінше:
- 65 рет карантиндік өнімді елге заңсыз енгізу әрекеті тоқтатылған;
- 79 халықаралық хабарлама (нотификация) жолданған;
- Құқық бұзушыларға жалпы сомасы 130 миллион теңгеден асатын айыппұл салынған.
«Жарты жылда фитосанитариялық талаптарды бұзу деректері көбейіп отыр. Бұл – елге қауіп төндіретін аурулар мен зиянкестердің кіру қаупін арттырады», – делінген министрлік хабарламасында.
Шекарадағы бақылау күшейтілді
Фитобақылаудың әлсіреуі ел аумағына қауіпті зиянкестер мен аурулар таралуына жол ашуы мүмкін. Осыған байланысты шекара аймақтарында бірқатар шара қолға алынған:
- ЕАЭО елдерімен шекаралас өткізу бекеттеріне фитосанитарлық инспекторларорналастырылды;
- Жылжымалы зертханалар іске қосылып, карантиндік өнімдерді жедел диагностикалау жүргізілуде;
- 145 заңсыз тасымалдың жолы кесілді.
Ақтөбе облысында пилоттық жоба іске қосылды
Бұдан бөлек, Ақтөбе облысындағы «Әлімбет» өткізу пунктінде карантиндік құжаттарды электронды рәсімдеу жүйесі пилоттық режимде іске қосылды. Бұл – фитосанитарлық құжат айналымын жеделдетіп, жемқорлық тәуекелдерін төмендетуге бағытталған бастама.
Фитобақылау не үшін маңызды?
Фитосанитариялық бақылау — карантиндік зиянкестер мен аурулардың ел аумағына таралуына жол бермеу үшін қажет. Егер фитобақылау осал болса, бұл отандық ауыл шаруашылығы мен азық-түлік қауіпсіздігіне тікелей қауіп төндіреді.
