Танымал қазақ дзюдошысы Еуропа Кубогында қола медаль жеңіп алды
Фото: olympic.kzТанымал қарағандылық дзюдошы Ислам Бозбаев Еуропа Кубогында қола медаль еншіледі, деп хабарлайды Қарағанды облысының әкімдігіне сілтеме жасаған KAZ.NUR.KZ.
Әкімдіктің мәліметінше, жарыс Грузияның Гори қаласында өткен. Додада 15 елден келген 200 спортшы бақ сынаған.
Қазақстан құрамасынан қарағандылық екі дзюдошы – Махамбет Даткин (-81 кг) мен Ислам Бозбаев (-100 кг) өнер көрсеткен.
Жарыс қортындысы бойынша Ислам Бозбаев қола жүлдеге ие болған. Ол төрт рет татамиге шыққан.
Дзюдошы алғашқы белдесуде грузиялық спортшыға есе жіберсе, екінші, үшінші белдесулерде сербиялық және әзербайжандық спортшыларды 10-0 есебімен жеңген.
Қола жүлде үшін белдесуде Ислам Бозбаев украиналық дзюдошыдан айласын асырған.
Ислам жалпы бұл жарыста бәсеке өте жоғары болғанын айтады.
"Мысалы, менің салмағымда Рио олимпиадасының күміс жүлдегері белдесіп, жеңіліп қалды. Бұл қарсыластардың өте мықты және жақсы дайындалғанын білдіреді. Жарыстың өзі жоғары деңгейде өтті және мен үшін тамаша тәжірибе болды", - дейді Ислам Бозбаев.
