Жастарды цифрлық сауаттылыққа баулу жалғасуда
Бүгінгі таңда қоғамда цифрлық сауаттылықтың маңызы арта түсуде. Осыған орай “Азаматтарға арналған үкімет” мемлекеттік корпорациясының Қызылорда облыстық филиалы “Қорқыт ата” университетінің студенттеріне арналған практикалық сабақ өткізді. Шара барысында жастар мемлекеттік қызметтерді онлайн түрде алу жолдарын тәжірибе жүзінде меңгерді.Сабақта студенттер электронды үкімет порталы арқылы түрлі қызметтерді рәсімдеу, сондай-ақ мобильді қосымшалар арқылы қажетті анықтамаларды алу, өтініш беру сияқты дағдыларды үйренді. Мамандар әр қызмет түрінің қолжетімділігін, қауіпсіздік шараларын және цифрлық қолтаңбаны қолдану жолдарын да түсіндірді.
Іс-шараның басты мақсаты — жастардың цифрлық дағдыларын арттыру, оларды заманауи технологияларды тиімді пайдалануға үйрету. Бүгінде мемлекеттік қызметтерді үйден шықпай-ақ смартфон арқылы алу мүмкіндігі бар, бұл өз кезегінде уақыт үнемдеуге және қызмет көрсету сапасын арттыруға септігін тигізеді.
Осындай бастамалар жастардың цифрлық мәдениетін қалыптастыруға, олардың еңбек нарығындағы бәсекеге қабілеттілігін арттыруға үлкен үлес қосады.
