АҚШ-Қытай сауда соғысы: Қазақстан қандай мүмкіндік алады
Фото: baq.kz Экономист Бауыржан Ысқақ АҚШ пен Қытай арасындағы сауда соғысынан Қазақстан қандай жаңа мүмкіндіктер алатынын айтты, деп хабарлайды BAQ.KZ тілшісі.
Ауыл шаруашылығы өнімдерінің экспорты артады.
Қытай АҚШ-тан әкелінетін кейбір ауыл шаруашылығы өнімдеріне баж салығын енгізгеннен кейін, Қазақстан бұл нарықтағы бос орынды толтыруға мүмкіндік алды. Мысалы, 2024 жылы Қазақстанның Қытайға бидай экспорты 50%-ға артты. Сонымен қатар соя бұршақтарын жеткізу көлемі де ұлғайды, - дейді сарапшы.
Сауда және көлік байланыстары нығаяды.
Қытай мен Қазақстан арасындағы сауда айналымы тұрақты өсіп келеді. 2023 жылы екі ел арасындағы сауда көлемі рекордтық 41 миллиард долларға жетті, ал 2024 жылдың алғашқы тоғыз айында бұл көрсеткіш 33 миллиард болды. Бұл өсім көлік және логистика саласындағы ынтымақтастықтың нәтижесінде мүмкін болды, - деп түсіндірді Ысқақ.
Инфрақұрылымдық жобаларға инвестициялар артады.
Қытайдың “Бір белдеу, бір жол” бастамасы аясында Қазақстан инфрақұрылымдық жобаларға инвестициялар тартуда. Бұл жобалар көлік дәліздерін дамытуға және Қазақстанның транзиттік әлеуетін арттыруға бағытталған.
Жалпы алғанда, сауда соғысы Қазақстанға Қытай нарығындағы өз позициясын нығайтуға және экономикалық әртараптандыруға мүмкіндік береді, - деп есептейді сарапшы.
