Қол жетпей келген құрылғы
Қазіргі кезде жүктіліктің әртүрлі патологиялары барған сайын анықталуда. Бұл экологияның нашарлауына, дұрыс емес өмір салты мен тамақтану және басқа да көптеген себепке байланысты. Ұрық дамуының патологиясын дәл диагностикалау үшін мұндай әдістер 3D және 4D ультрадыбыстық құрылғы көмегімен көлемді кескіндер ретінде қолданылады. Мұндай әдістер жақында пайда болды. Заманауи аппаратқа зерттеу жұмыстары шамамен 20 жыл бойы жүргізілді. Соны жабдықтың ерекшелігі – 3D және 4D көлемді кескіндер болып табылады. Бұл ұрықты жатырдың барлық жағынан қарауға, оның жатыр қуысына байланысын зерттеуге, плацента мен кіндіктің жағдайын бағалауға мүмкіндік береді. Мұның бәрі нақты уақытта жасалынады. Осындай зерттеудің жас ата-аналар үшін тағы бір артықшылығы – бұл нәрестенің бейнесін алу мүмкіндігінде болып саналады. Олар оның қалай қимылдайтынын, дыбыстарға қалай әсер ететінін және оның эмоционалдылығы қандай екенін көре алады. Соңғы уақыттары жас келіншектердің жүктілігі ауыр өтетіндіктен іштегі сәбидің ақаусыз дамуын байқау мақсатында қазалылықтарды облыс орталығына жолдауға тура келеді. Пациенттер Қызылорда қаласына барып-келуі мен онда жүріп-тұруы қиындық тудыратыны ақиқат. Сондықтан теміржол емханасының І-санаттағы дәрігер узисті Наурызбек Сырымбаев Қазалы теміржол ауруханасының бас директорына пациенттердің қамы үшін арнайы аппаратты алу ұсынысын ортаға салады. Әрдайым жаңашылдыққа жаны құмар басшы Құбыл Ршымбетұлы бірден келісімін беріп, іске кіріседі. Әкімшілік мүшелері ойласып, халыққа қажетті құрылғыға тапсырыс беріледі. Жаңа жабдық 1 айдың ішінде діттеген орнына келді. Енді оған арнайы кабинетті дайындап, тұрғындарға бар жағдайды жасау көзделуде.– Жалпы, бұл аппарат “Voluson E10” маркалы Австрияда жасалған. Көбінесе жүкті әйелдерге арналған. Дегенмен басқа да ағзадағы дене мүшелерін бақылауға болады. Ерекшелігі іштегі өзгерістерді мәселен, бауыр мен бүйректегі тастарды анық көрсетеді. Осы сынды УЗИ құрылғысы облыста санаулы. Ал аудан бойынша алғашқы болып біз қондырудамыз. Алғашқы ультрадыбыстық зертеуді де өткіздік. Жаңа бір пациенттің өтіндегі тасты анықтадық. Кабинетімізді әлі де толықтырып жабдықтаймыз. Бұйырса шетелдегідей үлкен теледидар әкеп орнату ойда бар. Тексерілуге келгендер сол теледидар арқылы аппарат түсірген картинаны көре алады.
Ал “Voluson E10” жайлы айтсақ, ол 3D және 4D форматында қызмет көрсетеді. Мысалға, 3D арқылы сәби жүрегінің клапандарын байқауға болады. Баста, бүйректе пайда болған кисталарды анықтайды, – дейді Наурызбек Өтепәліұлы.
Дәрігердің мәлімдеуінше, үшөлшемді және төртөлшемді зерттеуге арналған аппаратта бірнеше жазықтықта дыбыстық толқындар шығаратын және алатын арнайы 5 датчик бар. Сондықтан үш өлшемді сурет алынады. 4D ультрадыбыстық төртінші рет параметрге ие. Уақыт өте келе баланың мотор белсенділігі ананың денесінің жағдайының өзгеруімен бағаланады.
3D және 4D ультрадыбыстық тексеріс жүктілік кезінде барлық әйелдер үшін жасалмайды. Бұл технология қымбат, сондықтан оны қолдану мүмкіндігі барлық медициналық мекемелерде бола бермейді. Негізінен жоғары технологиялық зерттеулер екі өлшемді ультрадыбыстық зерттеу кезінде анықталған ұрықтың дамуындағы ауытқулар, оның белсенділігі мен орналасуын бағалауға, егер ата-аналарында болса генетикалық ауытқулардың даму қаупін, ұрықтың ішкі мүшелерінің толық дамуын және олардың дұрыс орналасуын анықтау үшін жүргізу ұсынылады. Төртөлшемді зерттеу үш өлшемді зерттеуден тек уақыт параметрінде ғана ерекшеленеді. Сондықтан тек ата-аналар үшін нәрестенің іс-әрекетін қарауға ғана жасалады.
Медициналық стандарттарға сәйкес ультрадыбыстық зерттеу жүктілік кезінде үш рет – 12 аптада, 20 мен 24 аптаның арасында, 32 аптада жүргізілуі керек. Стандартты ультрадыбыстық зерттеу шамамен он бес минутты алады. Қан ағымын зерттеу және жүрек жұмысын бағалау үшін доплер ультрадыбыстық зерттеу жасалады екен.
Айнұр ҚАЗМАҒАМБЕТОВА
