2021 жылғы қыркүйекте Қазақстан Республикасы қаржы нарығын реттеу және дамыту агенттігі, банк омбудсмені, қаржы институттары және қоғамдық бірлестіктер арасында осал топтарға жататын ипотекалық қарыздар бойынша жалғыз тұрғын үйді өткізуді және одан азаматтарды шығаруды тоқтата тұруды көздейтін өзара түсіністік пен ынтымақтастық туралы меморандумға қол қойылды. Бұл құжатты әзірлеу ағымдағы жылдың маусым айынан бастап жүргізілді, деп хабарлайды Қазақстан Республикасы қаржы нарығын реттеу және дамыту агенттігінiң баспасөз қызметі.

Меморандум шеңберінде проблемалық берешекті реттеу, тұрғын үйден шығаруға байланысты мәселені шешу және келісімге қол жеткізу, сондай-ақ, қарыз алушының қол жеткізілген келісімнің шарттарын тиісінше орындауы кезеңінде банктер тоқтата тұрады:

1. Ипотекалық шарттардан құқықтық қатынастар негізінде туындаған берешекті өндіріп алу үшін атқарушылық жазбаны жасау үшін сот талап-арызын беру, нотариусқа жүгіну;

2. Банктің балансына қабылданғанын қоса алғанда, жалғыз тұрғын үйді сату;

3. Қарыз алушыларды, оның ішінде банктің балансындағы осы мүліктің бұрынғы меншік иелерін тұрғын мүліктен шығару.

Меморандум қол қойылған күннен бастап күшіне енеді және тараптар оған қол қойған күннен бастап бір жыл ішінде қолданылады.

Бұған дейін, Қазақстан президенті Қасым-Жомарт Тоқаев Алматыда болған атыс туралы айтқан болатын. Ол банктердің қатынастарына және проблемалы қарыз алушылардың кепілдік мүлік бөлігіндегі қатынастарына қатысты түзетулер пакетін әзірлеу қажеттігіне назар аударды.