Ізденімпаз ізкесушілер
Бала күнімізде үлгі қылып өскен атақты детектив Шерлок Холмстың болмысын ойыңа оралтатын жедел іздестіру тобының құрамындағы бұл жігіттердің мамандығы айрықша қасиеттерді талап етеді. Зерттеу нысанын ашуда әрбір айғаққа жіті мән беріп, істі нәтижелі жүргізуге ықпалын тигізетін полиция бөлімінің криминалдық полиция бөлімшесі – тәжірибесі толысқан мамандар топтасқан бөлімше.Сырт көзге қарапайым болып көрінгенмен, білікті маман болу үшін мұндағылардың әрбірі ұдайы ізденіп, жаңашылдыққа бой алдыруды күнделікті әдетіне айналдырған. Өйткені қылмыстың ізін суытпай, тез арада ашылуын криминалистерсіз елестету мүмкін емес. Күнделікті жұмыста қылмысқа қарсы күрес пен жедел ахуалды тұрақтандыруды қадағалайтын мамандар түрлі зерттеу, нақты айғақ заттар арқылы мән-жайдың ақ-қарасын ажыратып, дәйекті дәлелдермен істің толық жүйесін құрастырады.
Жедел криминалистерге жүктелетін жүк қашанда ауыр. Сөзімізді соңғы жылдары атқарылған істер нақтылай түседі.
Есепті кезең ішінде бөлім криминалистерінің зерттеу өндірісі және тексерістік тексеру жұмыстар көрсеткіші артқан.
Аудан көлемінде «Мал ұрлаушы», «Соғым», «Пәтер», «Қару» жедел профилактикалық іс-шаралары өз дәрежесінде жүргізіліп, нәтижесінде 18 мал ұрлығы дерегі анықталып, 22 пәтер тонау қылмысы құрықталған. Олар санатына қарай сотқа жолданған. Азаматтық қаруға байланысты учаскелік полиция инспекторларымен бірлескен тексеріс жүргізіліп, әкімшілік шара көрілген.
Жыл басынан бері пәтер қарақшылығымен айналысқан екі топ ұсталып, 13 қылмыс анықталып, сотқа жөнелтілген. Мұнан өзге іздеуде жүрген қылмыскерлерді ұстау, анықтау жұмыстарында да көрсеткіштерге қол жеткізілген.
Саусақ іздері арқылы талай ұрлық ашылған. Мәселен, бір ғана саусақ ізімен жеке белгілері сәйкес келген қылмыскерді құрықтап, істі ашуға атсалысқан топ мүшелеріне тұрғындар ризашылық білдіруде.
Ғылымда одорология деген атпен таныс тәсіл өзінің тиімділігін аңғартқан. Қызығы сол, адамның қан тобы, саусақ іздері сынды денеден шығатын иісі де ешуақытта қайталанбайтын көрінеді. Криминалистердің айнымас серігіне айналған Мэги есімді қызметтік иісшіл иттің де үлесі зор.
Бұл жолда бір сәт салғырттық, немқұрайлылыққа жол беруге болмайды. Полиция майоры Асылбай Аңсатов басшылық ететін бөлімше жедел уәкілдер, полиция майоры Алмат Бердібеков, Ұланақ Сейілхан, полиция капитаны Шернияз Сейтімов, Мұрат Баймаханов, Нұрбек Алмағамбетов, полиция лейтенанты Ақылбек Есмұрзаев және полиция сержанты, кинолог Ақжол Айымқұлов сынды сайдың тасындай ер азаматтардан құралған.
Тындырымды тірлікте табандылық танытып жүрген топты мереке қарсаңында біз де құттықтадық.
Алтын ҚОСБАРМАҚОВА
