Жағдай жіті бақылауда
25 желтоқсан күні Қазалы ауданының тұсында Сырдария өзені бойындағы қорғаныс бөгеті жырылып, дарияның ескі арнасынан су ақты. Өңірлік коммуникациялар қызметі алаңындағы интернет-конференцияда облыстық жұмылдыру дайындығы басқармасының басшысы Асылбек Шәменов жағдайдың жіті бақылауда екенін жеткізді.– Су елді мекендер мен Қазалы қаласына дейін жеткенімен, ешқандай қауіп төндірген жоқ. Аудан әкімдігімен бірлесе қабылданған шаралардың нәтижесінде суды бөгеп, тоқтатуға мүмкіндік туды. Қауіпті аймаққа азаматтық қорғау құрылымдарының 150-дей қызметкері мен 51 арнайы техника жұмылдырылды, – деді ол.
Сала жетекшісінің айтуынша, қазіргі уақытта Арал ауданынан бастап Қызылорда қаласына дейінгі аралықта өзенде мұз ұстасқан. Солтүстік аудандарда мұздың қалыңдығы – 15-20, облыс орталығы бойынша – 10-15 сантиметр.
Сырдарияның бойында ұзындығы 609 шақырым болатын қорғаныс бөгеті, 56 қауіпті учаске орналасқан. Бүгінгі күні Шардара су қоймасынан облысқа секундына 650 текше метр су жіберіліп жатыр.
– Мұнда әзірге судың көтерілу жағдайы, басқа да қауіп-қатер байқалмайды. Қызылорда қаласы мен аудандар бойынша бекітілген жауапты мекемелерде инертті материал қоры тиісті деңгейде жасақтаулы. Техника сақадай сай, – деді А.Шәменов.
