М.Әуезов атындағы жоғары оқу орнына зерттеу университеті мәртебесі беріледі

"М.Әуезов атындағы Оңтүстік Қазақстан университеті коммерциялық емес акционерлік қоғамына зерттеу университеті мәртебесі берілсін.

Оқу орнын зерттеу университетіне айналдыру және ЖОО-да жаңа инновациялық зерттеу экожүйесін құру ғылыми-зерттеу қызметін қарқындатуды және дамытуды, басым даму бағыттарын кадрлық қамтамасыз етуді және университеттің ғылыми-білім беру қызметін инфрақұрылымдық қамтамасыз етуді түбегейлі өзгертуді қажет етеді.

Осы мақсаттарға қол жеткізу үшін Қазақстан Республикасының 2025 жылға дейінгі ұлттық даму жоспарының, Қазақстан Республикасының индустриялық-инновациялық дамуының 2020-2025 жылдарға арналған мемлекеттік бағдарламасының, сапалы білім беру "Білімді ұлт" ұлттық жобасының, Қазақстан Республикасының ғылымын дамытудың 2022-2026 жылдарға арналған тұжырымдамасының, "Цифрландыру, ғылым және инновация есебінен технологиялық серпіліс" ұлттық жобасының және басқа да бағдарламалық құжаттардың басымдықтарына сәйкес жүзеге асырылатын болады", - деп көрсетілген Ғылым және жоғары білім министрлігі ұсынған жағдайды талдау құжатында.

Оқу орнына зерттеу мәртебесін беру негізінде онда халықаралық еңбек нарығының талаптарына сай келетін қос дипломды білім бағдарламасы әзірленеді.